![Loading Events](http://goethe-zentrum.am/wp-content/plugins/the-events-calendar/src/resources/images/tribe-loading.gif)
- This event has passed.
Ցուցահանդես՝ Կամո Նիգարյան «Թղթե ականներ»
04/02/2022 @ 18:00 - 31/03/2022 @ 18:00
Event Navigation
![](http://goethe-zentrum.am/wp-content/uploads/2022/02/Untitled-1.png)
Գյոթե կենտրոնը «Թեք տեղ» թատրոնի և Հայաստանի ազգային պատկերասրահի հետ միասին ներկայացնում է հայ ժամանակակից արվեստի և դիզայնի ականավոր դեմքերից մեկի՝ Կամո Նիգարյանի (1950-2011) պաստառային արվեստի առաջին հետահայաց ցուցադրությունը։
«Թղթե ականներ» ցուցահանդեսը ընդգրկում է ավելի քան յոթանասուն տպագրված և անտիպ պաստառներ, ինչպես նաև նախապատրաստական էսքիզներ, որոնք ամբողջական պատկերացում են տալիս 1970-2000-ականներին Նիգարյան գրաֆիկ-դիզայների մասնագիտական զարգացման մասին: Անդրադառնալով քաղաքական, թատերական, ցուցահանդեսային և կինոյի թեմաներին, Նիգարյանը կոտրեց այն իլյուստրատիվ և խրատական մոտեցումների սահմանը, որոնք բնորոշում էին պաստառների նկատմամբ վերաբերմունքը ԽՍՀՄ-ում և Հայաստանում։ 1960-ականների լեհական, կուբայական և արևելա-գերմանական գրաֆիկական արվեստի ազդեցության տակ նկարիչը միաձուլեց էքսպրեսիոնիստական, սյուրռեալիստական և մինիմալիստական ոճերը գրատպության կոնցեպտուալ կիրառմամբ՝ ստեղծելու «քննադատական» պաստառի իր ուրույն տեսլականը:
Այնուամենայնիվ, Նիգարյանի սյուրռեալիստական պաստառների էսթետիկորեն այլայլող և մտավորապես սադրիչ բնույթը մերժված էր խորհրդահայ արվեստի կողմից, ինչի արդյունքում տպագրվել են նկարչի սոսկ մի քանի պաստառային նախագծեր: 1981 թվականից սկսած Նիգարյանը հիմնականում դիմել է գեղանկարչությանն ու լուսանկարչությանը, և միայն կյանքի ուշ շրջանում է կարողացել լիովին իրականացնել գրաֆիկական դիզայնի իր հայեցակարգային մոտեցումները Ազգային պատկերասրահի ֆիլմերի ցուցադրության ծրագրի համար պատրաստած պաստառների շարքում:
Այս բորբոքող պատկերները ամբողջացնում են Նիգարյանի ետարդիական գեղագիտությունը բազմածիր պատկերային մի լեզվում, որը հաստատում է այս միջոցի նշանակությունը որպես արվեստի ձև և բացահայտում ժամանակակից հայկական դիզայնի՝ նախկինում անտեսված փորձարարական մոտեցումների բազմազանությունը: Վերջին տարիներին Նիգարյանի ստեղծագործության վերաբացահայտումը եղել է ոգեշնչման կարևոր աղբյուր երիտասարդ հայ գրաֆիկ նկարիչների համար՝ դառնալով որոշակի խթան Հայաստանում պաստառային արվեստի վերածննդի համար:
Ցուցահանդեսի համադրող՝ Վիգեն Գալստյան (PhD)
Ցուցահանդեսի համադրող՝ Վիգեն Գալստյան (PhD)
Հայաստանի ազգային պատկերասրահ
Փետրվարի 4 – մարտի 31
Մուտքը՝ Արամի փողոցից
Խնդրում ենք թանգարան մուտք գործելիս պահպանել ՀՀ Առողջապահության նախարարի 2022 թ. հունվարի 5-ի N 02-Ն հրամանում սահմանված կետերը:
Փետրվարի 4 – մարտի 31
![📍](https://static.xx.fbcdn.net/images/emoji.php/v9/t2d/1/16/1f4cd.png)
![❗️](https://static.xx.fbcdn.net/images/emoji.php/v9/t50/1/16/2757.png)